الرئيسية / ثقافة وفن / موهوبي الشعر العربي| «مينا نبيل» يكتب: زي النهاردة من سنة

موهوبي الشعر العربي| «مينا نبيل» يكتب: زي النهاردة من سنة

كتبت – إيچيبت نيوز


22053238_1203409679763774_568789476_n

زي النهاردة من سنة
كل الحاجات أتغيرت
فضلت مكانها أتبعترت
حتى أنا مَبقتش أنا
يمكن بقيت لكن زيادة عن اللزوم
خيال لشئ مبقتش عارفه من الهموم
داخل براسي المعجنة
غرقان في وسط الذكريات
قاعد بقلب في اللي فات
مشتاق للمسة حنينة
تمحى الهموم تحيي اللي مات
عدت ساعات
ولسة حالة من السكات بتخبى ميت صرخة وجع
ليه يا جدع؟ وأشمعنى أنا؟
حالة برود
أفكار كتير بينافسوا بعض على الوجود
بينهم أنا محتار وواقف عالحدود
خلص الكلام قالتها فكرة مسيطرة
إنكار جميل الهم حالة من الجحود
الكل محسوبلك تمام …. بالمسطرة
دكتور هعيش؟
والغالى عندك إيه الحقيقة …. خلاص مفيش؟
دة أنا لسة جايلك من دقيقة وكان يدق كما الساعات
ولا الزمن من صدمته وقف يدمع على اللي فات
طب شوفلي غيره … حد يتبرع؟ حبايب؟ لأ مليش
شكراً لوقتك … متساويش
يارب أنت اللي بتعرف وانت علام الغيوب
أنت اللي عارف إني معجون في النواقص والعيوب
لكن مليش غيرك تعين فى المسألة
جايلك وفوق راسي البلاوى متلتلة
لا قدرت أشيلها ولا عرفت إزاى أتوب
وحملي يوم عن يوم بيتقل
مش أنت قولت إنك هنا وبتحبنا؟!
زي النهاردة من سنة … كنت مغفل

عن admin1

شاهد أيضاً

استوديو “بروفة” في مسرح النهار من جديد

كتب – يوسف عباس اقبل جمهور المسرح في الفترة الاخيرة على شباك تذاكر “مسرح النهار”، ...